ما رضائي

تَش گُلِس مينِ دِ لوُمْ / باد وَش گرفت زوُر	اَ داغِت لوُمْ زنهَ / هيچ نَمبوُوهَ كوُر
نَمروُوي اَ خاطرمْ / مهرت كُنوُمْ سَرد	لِف كَبوُتَر توُو كُنوُمْ / شوُ اَ وِرِ دَرد
مِبينا هَمچُو خواري / داغِ برارِش	مَبُرهَ بَرِش خدا / گِرهَ سُراغِش
نَمگرهَ آروُمْ دِلوُمْ / طاقت ندارهَ	پيش كي وازِش كُنوُمْ / كه سَر دِرارهَ
فتنِت داغي بِسهَ / مين كُلِ جوُنوُمْ	بِسوُزهَ لِف تنيري / مين اُستخوُنوُمْ
سموُ ايي دِلموُ / هِي غَمْ ببارهَ	لِف زمين شوُرهَ زار / هِي بي بهارهَ
شوُ اوُمهَ توُو وَندهَ وَمْ / تا سِحَر بيارُمْ	چه وِري دِلوُمْ كُنوُمْ / چارهَ ندارُمْ
خواروُنِت چيكِ زِنِن / پِلان بُريدِن	هَر چي غَمْ مينِ دُنيا/ وَر جوُن خريدِن
مَكُنيت مَنعِ دِلوُمْ / هِليم گريووُمْ	دَردِ دلْ پي خوُمْ گوُومْ/ بَلكوُمْ فريووُمْ
هَر وَقتي فَهمُومْ / هَمْ نوُمْ توُ نوُمي	دَسِمهَ ديوار گِروُمْ / موُنوُمْ يهَ دِموُني
ِيا يي بينوُمِت / وَمْ نَمزني سَر	ندوُنوُمْ دِلگير بيسيهَ / يا كوُر دِيهَ قَر
عروُستهَ سوُار كُنوُمْ / اَسبِ سِمَندي	هلهلهَ بپا كُنوُمْ / كِلِ بِلنَدي